ہندوستان پاکستان کشیدگی کے درمیان یوپی حکومت تاج محل میں اینٹی ڈرون سسٹم نصب کرے گی تاکہ ڈرون حملوں سے تاریخی یادگار کو محفوظ رکھا جاسکے۔

ایک سینئر اہلکار نے اتوار کو تصدیق کی کہ ممکنہ فضائی خطرات سے نمٹنے کیلئے حکومت تاج محل میں ایک اینٹی ڈرون سسٹم تنصیب کرنے کیلئے تیار ہے۔ یہ اقدام ۷؍ مئی کو آپریشن سندھ کے تحت ہندوستان کے سرحد پار سے ہونے والے حملوں کے بعد بڑھی ہوئی کشیدگی کے تناظر میں سامنے آیا ہے، جس میں پاکستان اور پاکستان کے زیر قبضہ کشمیر میں دہشت گردی کے نو مراکز کو نشانہ بنایا گیا تھا جو پہلگام قتل عام کے جواب میں کئے گئے تھے۔ فی الحال سینٹرل انڈسٹریل سیکوریٹی فورس (سی آئی ایس ایف) اور اتر پردیش پولیس کے ذریعہ محفوظ، تاج محل کو جلد ہی جدید ڈرون نیوٹرلائزیشن ٹیکنالوجی کے ذریعے محفوظ بنایا جائے گا۔ یادگار کے دفاع کو تقویت دینے کا فیصلہ حملوں میں ڈرون کے ممکنہ استعمال پر بڑھتی ہوئی تشویش کی عکاسی کرتا ہے، خاص طور پر ہائی پروفائل اور ثقافتی طور پر اہم مقامات پر۔

یہ بھی پڑھئے: بنگلور: فل ٹائم جاب ہے مگر ٹیم لیڈ بوریت دور کرنے کیلئے اوبر کیب چلاتا ہے

اس ضمن میں اسسٹنٹ کمشنر آف پولیس (تاج سیکوریٹی) سید اریب احمد نے بتایا کہ ڈرون مخالف نظام کا رینج ۷؍ سے ۸؍ کلومیٹر ہوگا جس کی بنیادی تاثیر مرکزی گنبد کے ۲۰۰؍ میٹر کے دائرے میں ہوگی۔یہ نظام علاقے میں داخل ہونے والے کسی بھی ڈرون کے سگنل کو خود بخود جام کر دے گا، اور اسے سافٹ کِل میکانزم کے ذریعے ناکارہ بنا دے گا۔‘‘ مؤثر عمل درآمد کو یقینی بنانے کیلئے ایک پولیس ٹیم کو آلات چلانے کی تربیت دی جا رہی ہے۔ رسپانس ٹیم ڈرون کے ماخذ کا پتہ لگانے اور اس علاقے کو محفوظ بنانے کی بھی ذمہ دار ہو گی جہاں اسے روکا گیا ہے۔ توقع ہے کہ آنے والے دنوں میں سسٹم کی تنصیب مکمل ہو جائے گی۔ ہندوستان کے سب سے زیادہ دیکھے جانے والے سیاحتی مقامات اور یونیسکو کے عالمی ثقافتی ورثے کی جگہ کے طور پر، تاج محل ہر سال لاکھوں زائرین کو راغب کرتا ہے۔